Ballad of Irom Sharmila

Insaani jazbe ki misaal hai koi ye kahe
Ya tu opposition ki chaal hai ko ye kahe
Jaane bachane, aman ko laane ke leke khayaal
Tu bhukhi rahi ik na do din par purey solaah saal

Sunn re deewani Irom Sharmila tujhko kya mila
Todd hi daala humne aakhir tera hausla

Baat hai tab ki jab tu jawaan thi khwaabon se bhari
Human rights ki baatein likhti raheti tu khari
Phir ik din AFSPA ke panje aise jo pade
Dekhe tune goli kha kar girte bacche aur budhe

Khoon se gili padi mitti mein ek phool khila
Todd hi daala humne aakhir tera hausla

5 November 2000 mein strike shuru hua
Kahna chhoda, pani chhoda na baalon ko chua
Aaine mein apni shakal bhi na dekhi na maa bhi mili
Na jaane kai baar suicide case mein jail bhi chali

Naak mein naliyaan leke jali par jazba na galaa
Todd hi daala humne aakhir tera hausla

Sarkarein aayin aur gayi par tu addi rahi
Tu na tooti aur AFSPA ki deewar khadi rahi
Phir tera dil bhi ik shaks ke khatir dhadka 
Usko gaddari kehke pura awaam bhadka 

Pyaar ko pyaar kabhi na mile, yahi hai bas sila
Todd hi daala humne aakhir tera hausla

Phir tang aakar akhir mein tune anshan toda
Naye tarike se AFSPA mitane tune chunaav ladaa
Tujhse mile bas sapne hamein, auron se note mile
Insaaniyat ke naate hi tujhe bas 51 vote mile

Tu royi par phir bhi hamara dil nahin pighala
Todd hi daala humne aakhir tera hausla