FTII

Yahan filmein banti hai,
kataputlion ka khel nahin
Ye deewano ki mehfil hai,
political sale nahin

Kaurav Pandav phir se saje
Sabne milke jua kiya
Ye institute bani Draupadi
Yudhishtir sala jeet gaya

Delhi mein khairaat looti
Mauqaparast jholi bhar gaye
Ye kis jholi mein giri institute
Kya baaki fankaar mar gaye

Tum hum ko kya darate ho
Ye netaon ki gulati nahin
Ye itni purani hai institute
Jitni tumhari party nahin

Ye party ki rasmein nahin
Acche dino ki qasme nahin
Hamein nai aakhein do
Sarkari kaale chasme nahin

Yahan filmein banti hai,
kataputlion ka khel nahin
Ye deewano ki mehfil hai,
political sale nahin