1947 Se AK-47 Tak

Socha tha angrezon se chhutkara mila
Par badle mein humko batwara mila
Two nation theory ko zarur hota tha
Jo ithihas mein sabko amar hona tha
Ik sahab yahan pe PM bana
To duja wahan pe Qaid-e-azam bana
Dus lakh se zyada isme maare gaye
Aur sharm ke bhi kapde utaare gaya
Iss sab ki wajah main na samjha kabhi
Phir bhi 15 August manate hain sabhi

Nayi nayi aazadi se khaufnaak partition tak
1947 Se AK-47 Tak

Phir Kashmir ki baari aayi
Khicha taani mein chhid gayi ladai
Pak ne proxy war ki chaal chali
Toh India ko bhi ghusne ki wajah mili
Raja wahan ka darr ke bhaga
Phir ek naya kanoon jaaga
Kashmir thoda thoda dono ne milke khaya
Aur jeet ka geet dono ne aaya
Yahi silsila ab tak chal raha hai
Haath saikh lo Kashmir jal raha hai

Honeymoon destination se torture aur detention tak
1947 Se AK-47 Tak

Phir chhidi 1965 ki jung
Dono kude le Ameriki hathiyaar sang
17 dino tak aatishbaazi chali
Dono ne ek duje ki zameen hathiya li
Aur hathiyaraon ke liye haath jode 
Toh uncle sam ne kar liye haath khade
Phir gusse mein Pak jaake cheen se mila
Aur Hindustan Rus ki goad mein jhula
Ye sab jaakar akhir Tashkent mein ruka
Phir dono ne kaha, 'sala dusra jhuka!'

Dono bhai lade bohot, UN Intervention tak
1947 Se AK-47 Tak

Ithihas mein ye ajooba pehli baar hua
Do jagah ek hi mulk, bich mein dushman leta hua
Jaise bina dhad ke do par udne chale
Aur kya khair usme bhi bas ik par ki hi chale
Aakhir East Pakistan se bagawat kardi
Toh west ne uski chhati goli se bhar di
Students, buddhijiwi chunke maare gaye
Laakhon refugees India ke kinare gaye
Aakhir Hindustan isme masiha bana
Aur 13 din ki jung baad Bangladesh bana

Rape, murder, migration se Bangladesh liberation tak
1947 Se AK-47 Tak

Ab dono busy rahe nuclear bomb banane mein
Aur dono ne chati peeti ye khabar sunane mein
Pak LOC cross kar kargil par jaa baitha
Hindustan bola 'arey, kal tak main wahan par tha'
Hazaaron jawanon ne isme jaan gawaa di
News channelon se dikha dikha TRP badha li
Jab nuclear war hone ke asaar jab jaage
Toh uncle sam pressure banane Pakistan bhage
Phir jeet ke India desh bhakti ke nashe mein jhula
Issi bahane NDA ko phir bahumat mila

Election se war aur war se phir election tak
1947 Se AK-47 Tak