Political pyaar

Tu apni adaaon mein masroof thi
Main apni pareshaniyon se khafa
Tu sochti thi selfie thik aayi ki nahin
Main sochu ye sarkar naa aaye agli dafaa

Toh kaise bata hum dono ek hain
Teri selfie ki tarah, jab news fake hai

Pareshan zulf aur hassi gumshuda
Hain be-noor raatein, tere din ghamzadaa
Kahan gaye woh capitalist khwaab tere
Jinke piche bhagti rahi tu sadaa

Bataa meri jaan tujhko kya mila?
Jab sard raat mein ho kambal geela

Main kehta tha tujhko ki tu mere saath chal
Tu boli thi pehle apna huliya badal
Par dekh meri jaan kaise din badal gaye
Tujhko chahane wale sab nikal gaye

Ab mehangaai ki tarah teri umra badh rahi
Jaise democracy se azaadi udd rahi

Tu gham na kar mere jaane ke baad
Mat soch ki main gaya Islamabaad 
Mere baare mein news TV par jo aayegi
Par haay tu bhi isko sach maan jaayegi

Tu yaad aayegi par kya faayda
Jab sach, sach nahin aur jhuuth ho qaayda 
Toh bataa meri jaan tujhko kya mila?
Jab sard raat mein ho kambal geela